بالفيديو.. خالد الجندي يهاجم عمرو أديب: «إنت منفسن مني ليه؟»

انتقد الشيخ خالد الجندى، عضو المجلس الأعلى للشؤون الإسلامية، حديث الإعلامي عمرو أديب، عن تصريحاته عن الجنس في الجنة، قائلا: «امبارح الإعلامي الكبير عمرو أديب بيتحدث مع الدكتور سعد الهلالي عن تنظيم الأسرة، وفجأة قال الشيوخ عندنا بيتكلموا عن الجنس في الجنة، طيب يا عمرو موضوع تحديد النسل، مش ذنبى انك صحيت النهارده تتكلم في الموضوع ده انا صدعت الناس في برنامجى هنا بالموضوع ده، احنا في خندق واحد من أجل الوطن ايه لزمته اللى عملته ده».

وتابع الجندى، خلال حلقة برنامجه «لعلهم يفقهون»، المذاع على فضائية «dmc»، اليوم الأربعاء: «عمرو خد بالك كلامي عن الجنس في الجنة، مهم جدا لأنه كشف مستغلى النساء واللى بيبصوا لها أنها وعاء للشهوة، والدواعش الموجودين في الإعلام والمؤسسات الدينية.. الناس دي شايفة أن المرأة هي المكافأة التي يحصل عليها اللى هيموت الناس ويفجر نفسه».

واستكمل الجندى: «يا عمرو كل واحد يقدر ينصح الناس ويعمل شغله.. شوف أنت شغلك وانا اشوف شغلى، وكفاية نفسنة، انا مش فاهم انت منفسن منى ليه بيظهر في عينك، عندك نفسنة منى ليه، انت راجل ديمقراطى لكن هاجمت رأيى في موضوع النقاب، وتقول داعية ومشهور وانت مش ناقص شهرة، انا عاوز اعرف انت مضايق ليه من رأيى».