رسالة مؤثرة من أحمد السعدني إلى طليقته الراحلة

كشف الفنان أحمد السعدني تفاصيل لأول مرة عن علاقته بطليقته الراحلة أمل سليمان, والتى رحلت عن عالمنا أمس السبت إثر أزمة قلبية.

وكتب في رسالة مطولة نشرها عبر حسابه الخاص على موقع تبادل الصور والفيديوهات إنستجرام، وقال..

"عمري في حياتي ما اتكلمت عن حياتي الشخصية لكن حسيت إني لازم أعمل كدة دلوقتي.. يوم 9 سبتمبر 2003 حب من أول نظرة في الشارع ما بين معهد السينما حيث كانت تدرس و معهد فنون مسرحيه حيث كنت الهو وأدرس برضه ميضرش كنت راكب عربية وكانت ماشية علي رجلها كنت هخبطها لكن حصل خير, لا محصلش قوي خبطتتي هي في قلبي حب تقطيع شرايين سنة خطوبة سنة كتب كتاب شهر جواز ثم خلفة أول ولد هنا بدأت المشكلة اللي بكتب الكلام ده عشانها.. أنا زي كتير للأسف شباب anti تحمل مسئولية بص لنسب الطلاق وأنت تفهم انا بيجيلي ارتيكريا لما احس اني مسئول و هي برضه حبيبتي زي بنات كتير بتقول طلقني أكتر م بتنطق اسمي".

أضاف " كانت النتيجه في أول سنه بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالى يا عم طبق الشروط أدي أول طلقة".

وتابع " قشطه يا باشا عشت حياتك؟ اه ...ارتحت ؟؟ لا وحشتني وحشني حنيتها وحبها وهبلها م تيجي نرجع يا بت يالا يا متخلف هووب جبنا تاني ولد نفس الإحساس نفس الارتكريا بس المرة دي صمود مش هينفع نتطلق تاني.. لا تصدق نفعت الجانب الأناني في شخصيتي غلبني يا عم كبر مخك وعيش حياتك المشكلة إني عمري ما ارتحت كنت عايز حضنها وحنيتها وهبلها بس كنت بأجل الرجوع يمكن أكبر أو اعقل او اقدر اتحمل المسئوليه بجد حددت لنفسي سن معين أرجع لها فيه قال يعني حبقي نضجت بس ملحقتش".

وتابع.." ماتت في لحظة كانت بتكلمني قبلها بساعة ومكنتش عيانة كان عندها ضغط زي أغلب الشعب المصري الحمد لله.. ماتت ومشيت وقررت تسيبني للأبد, كنت فاكرها حتستناني ومتأكد من ده مستحيل تحب حد غيري مجاش في بالي إنها ممكن تموت دلوقتي صغيرة وأكتر واحده في حياتي شفتها بتحب الحياه وعندها طاقة ايجابية، ماتت و سابتلي الولدين والندم".

واستطرد قائلاً: "أنا متأكد إنك في الجنة روحتي للي خلقك يوم عرفه وأميره وست البنات والستات ونضيفة وكريمة وصنتي ولادي وبيتي، بحبك يا أمل حياتي اللي اتهد وبوعدك المرة دي هشيل المسئولية.. للأسف اتعلمت الدرس بس بعد ما اتحرمت من حنيتك وحضنك وولادك كمان اتحرموا من أحن أم ربنا يقدرني وأربيهم أحسن ما كنتي عايزه بحبك ومش بطلب منك غير إنك تسامحيني، ربنا يرحمك ويرحمني ويرحم ولادنا يا حبيبة عمري الوحيدة".