![](https://www.soutalmalaien.com/uploads/1696273235_688722a0201621b77af2.png)
قديماً قالوا " الغجرية ست جيرانها " !
تذكرت هذا المثل الشائع وأنا أتابع "خناقة" بلوجر علي فيسبوك ،تشبه خناقات حارة سكسكة ، الست بتردح وهي بتهز مؤخرتها، علي طريقة "يا بلحة يا مقمعة، شرفتي اخواتك الأربعة" ، شعرت من طريقتها،أنها مزقوقة من حد علي حد ، بتقول أنها بتاعت دهب وتعطي كميات كبيرة للتجار وان أحد التجار الكبار اسمه محمد ، أخذ منها كمية ولم يقم بارجاع الدهب أو ثمنه .
للوهلة الأولي راودني الشك في روايتها، وشعرت أن هذا "الردح " وراه حكاية كبيرة، يعني فيها إن ، و مفيش حاجة إسمها سلمت كمية كبيرة من الدهب وأكل حقها ، لأن التجارة الكبيرة ، لا تتم من غير أوراق ، وإذا كان فيه حقوق يبقي فيه جهات رسمية مش حرب فيديوهات وهز ال "هنش" ، علي أي حال ، فجأة ظهر علي مواقع التواصل الاجتماعي فيديو تاني ، بيقول علي الست المشهورة بأم "هنش" انها نصابة وبتشتغل في الفالصو .. وبيحذر من التعامل معاها، و انقلب السحر علي الساحر ، وهاتك يا فضائح، والجرسة بقت على كل لسان والناس ملهاش سيرة الا عن أم هنش.... ومش كده بس ،واحد من أقدم تجار الدهب بيتهمها أنها نصابة، وابتزازها له تسبب في أزمة نفسية لأبنه بعد التشهير ،
الموضوع بدأ بفيديو لايف ، وكان واضح فيه الابتزاز ، قالت انه فيه واحد اسمه محمد جابر نصاب.. خد منها دهب عشان يبيعه بكميات كبيرة.. ومرجعهوش ولا رجع حقها فيه، ومش بس كده نزلت صورة ابنه في اللايف و قالت عليه أنه حرامي.. وأنه معاها مكالمة مسجلة وهو بيشتمها بأبشع الألفاظ
طبعا الفيديو في دقايق جاب ملايين، والناس تتابع .. لكن المفاجأة كانت لما الطرف التاني طلع يتكلم وقال أنه كلام الغندورة كله فنكوش.. لأنه لا راحلها ولا شافها ولا خد منها جرام واحد.. وتحداها في اللايف أنه لو كلامها صحيح تظهر صورة واحدة من داخل المحل.. والمكالمة المسجلة دي مش موجودة من أساسه ، والفيديو طبعا حقق ملايين المشاهدات ومئات التعليقات .
طب ليه عملت معاه كده؟.. جابر بيقول أنه هي بلوجر بتعمل دعاية للدهب.. لكنها لا عندها محلات ولا يحزنون وكل ده ملك لتاجر تاني، وهي ليها نسبة 20%.. يعني من الأخر محلاته مجرد ستارة ، في اشارة منه انه مصدر الحاجه دي مش مظبوط.. وكمان قال أنه الدهب اللي عندها فالصو ، لكن الغريب في كل ده مكنتش الخناقة اللي ما بينهم وبس.. الغريب هو الكومنتات الكتير اللي عند محمد والكلام اللي بيقولوه عليها .. اللي يقول أنها أصلا كانت محبوسة سنة في تزوير ورشوة.. واللي يقول دي أكيد بتشتغل في غسيل الأموال ، أومال جابت الفلوس دي كلها منين.. وكلام كتير ، والكلام ده مش من بدري.. فيه كتير ناس بتبقى عايزة تعرف أزاي ظهرت فجأة من العدم و بقي معاها الفلوس دي كلها.. خاصة انها كانت مجرد بياعة في محل دهب.. ودلوقتي حالها تغير كتير ، وبتتباهي بالدهب وهي بتهز وتتمخطر ،
تفتكروا مين اللي عنده حق في الحكاية دي كلها هي ولا هو ؟.. وهل فعلا ممكن تكون نصابة حسب كلامه ، علي أى حال هي تصرفاتها مريبة ، وبتتعامل في السوشيال مع ناس مشبوهة ، ومشغلة معاها فرقة يعملوا ريبورتات لوقف أي فيديو أو بوست يكشف جزء من أسرارها، وأحيانا تقوم بالتحريض علي فيديوهات غيرها ، وفي النهاية ، نستطيع القول أن أسلوب الابتزاز الرخيص ، جعلها دون أن تدري في مرمي الملاحقات وجنت علي نفسها براقش ، وانتظروا مزيد من الفضائح ، وهننشر حكايات تركيا ، حكايات تركيا يا مقمعة ، وبعد منخلص من تركيا ، هنروح أيطاليا .